應屆考生讀書心得📝

大家好～我係2020Dser Wally！

喺今次文憑試拎到Best6 40之前，其實我都經歷過校內排名只有大概50幾名、載浮載沉嘅階段，所以都想藉呢個機會同大家分享下我嘅讀書心得，幫大家打贏DSE呢場仗。

1. 幫自己訂立個To-do list

- 中四中五，甚至初中嘅同學可以試吓用by week/month嘅to-do list，列出一個星期/月要做嘅嘢，例如係一個星期要做一份通識paper2，或者一個月要睇一本書咁樣，之後自由安排呢個月做唔同task嘅先後次序，只要喺月尾之前完成就ok!

- 中六嘅同學就可能要用每日嘅to-do list，將自己讀嘅科目分咗兩至三組，每日完成一組科目嘅task，間住咁温書。例如話星期一嘅主科，星期二温選修科，星期三又返返去主科，如此類推。記住就算你幾討厭某一科，都要分配返一定嘅時間俾佢啊。

- 睇到呢到，你可能覺得就算自己定完目標，最後都可能會做咗deadline fighter，甚至完成唔到啲Task。就住呢個問題，我建議同學可以用以下兩個方法幫自己：

- 一，將to-do list貼喺一啲當眼位置。中四中五嗰陣迫切性冇咁大嘅時候，我就會將個表貼喺衣櫃/床頭，等自己喺間房hea嘅時候見到，篤促自己。到咗中六有時候就會將個list set做wallpaper/抄落張紙仔夾喺phone case到remind自己

- 二，將啲task斬件！如果只係好簡單咁喺寫「數學」兩個字喺to-do list嗰到，其實到真係做嗰一刻會有啲不知所措、唔知做咩好，亦都會減低你完成嘅意欲。所以理想啲嘅做法，係列出做嘅範圍同內容，例如「數學Ch.15 MC*20」。與此同時，因為你要做嘅task變得相對細碎同簡單，可能唔駛半個鐘都做得完，就會令你做嘅意欲提升！

2. Work-life Balance

- 喺我認識成績好嘅人入面，其實十有八九嘅生活都唔係只有讀書，有啲可能會做學生會，有啲就係校隊成員咁。

- 無時無刻都專注喺學業唔單止會令自己變得死板，仲會令你温習效能減退。反而間中放空下自己，做下運動對於温習幫助仲大。（P.s. 其實我都有將做運動呢個task加落每星期嘅to-do list到，可能一星期跑兩次街，每次半個鐘咁。）所以都好建議大家喺温習以外都俾自己放鬆下，例如玩音樂、做運動咁。

- 另外，有充足嘅睡眠都好重要。平常返學日我最少會瞓7個鐘，去到study leave同DSE嗰陣就每日9個鐘或以上。當然每個人體質唔同，需要嘅睡眠時間都唔一樣。但係如果喺臨考試前挑燈夜讀、通頂唔瞓覺，其實真係好不智：（所以，記住要瞓夠！)

- 最後，雖然都係老生常談，但都要記住，將時間用喺休息到並唔係浪費，而係幫自己行更遠嘅路。

唔小心講得長咗添 :p，遲啲開新post再講下個別科目嘅策略同揀科經歷，希望呢啲tips可以幫到大家啦！

#studygram #DSE2020 #T3782